香港人嘅核心價值根本就係炒賣

樓價舖價車位價最勁,食價物價標升,令生活百上加斤

香港地生活真係好困難，土地問題已經搞到大家一世做樓奴，就算平日有啲個人娛樂，一樣因為人多貨少造成炒賣現象。今日要講唔係炒樓呢啲大事，只係炒賣一般娛樂物品。其實好地地，點解正價會買唔到？會唔會有人故意囤積貨品？有人刻意夾份抬高價錢？炒賣已經可以話係好多香港人嘅核心價值。以下幾樣產品，保證係香港人嘅你，一定感同身受。

演唱會飛炒飛已經係人所公認嘅事實，每每未公開發售本身已經有一半飛供內部認購。開賣之後想搶？除非你排頭幾位，又或者咁好彩撞到入去買飛系統。想正正常常買一張飛咩？應該都好難，君不見之前無論五月天、陳奕迅、以至100毛分獎禮及黃子華舞台劇，全部都係要問過黃牛黨先咩？

 

Lego

男女老幼都啱玩嘅Lego，一樣要炒，Lego最多人炒就係一棟棟嘅樓，可以從一開始定價$1,200，一年唔夠去到$2,000；如果咁唔好彩停產，更加係以幾倍速度上升。唔單止樓，連一啲罕見嘅散件一樣照炒無誤。及至首間官方專門店終於開業，不過貨量似乎都依然不足，要玩玩具？繼續食炒價啦。

 

波鞋

最近嘅例子要數到3月時Adidas嘅NMD，每對由原本一千幾炒到過萬。除咗NMD，Jordan系列都係一樣，及抽次有新鞋出之時，大家都爭相去抽，每對一抽中轉手已經賺幾千，所以有話「抽波鞋好賺過抽新股」。幾多開波鞋店嘅老闆，話好景時月賺2百萬。

 

電話

基本宜家每次出新iPhone，大家已經唔係關心有咩新功能，係關心「炒唔炒得起」。每次有新機出現，大家每朝就捕係電腦前F5買新機，好彩買到即日去拎機，門口就轉賣畀收機佬，一轉手可以賺成千。令到真心想買新機用嘅朋友買唔到，反而要食炒價買貴機。

 

https://hk.style.yahoo.com/%E9%A6%99%E6%B8%AF%E4%BA%BA%E5%98%85%E6%A0%B8%E5%BF%83%E5%83%B9%E5%80%BC%E6%A0%B9%E6%9C%AC%E5%B0%B1%E4%BF%82%E7%82%92%E8%B3%A3-042423518.html